Cozcacuicatl, 37v – 38v

TRANSKRYPCJA

 

Nican ompehua Cozcacuicatl ytechpa yn itlacatiliztzin Totecuyo Jesuchristo oquitecpan don Francisco Placido ypan xihuitl 1553 años.

 

tiquitiqui tocoto tiquitiqui tocoto tiquitiqui tiquiti tiquitiqui tiquiti

1. Ma ontlatlauhtiloya[n], xicteoxiuhcozcatotomaca[n] in amotlayocol antepilhuan-i, ma chalchiuhcozcatl teocuitlacozcatl in amocuentax-i, ma yca ya ticahuiltiti yn oyehcoc ni Belem cemanahuaqu-i, temaquixtiani tla tihuiya[n] tlatlaquauh çane
2. in ma ontlachieloya[n], tomachhuané, ticcahuah tlapalizquixochitl moyahua yehua oncan temoc yn itlayocol yehua ya Diox-i cemanahuaqu-i
3. in quetzalcalitec hotenco ya oncan ye tonca in tichpochtli Santa Maria queço huel oncan tic-ya-tlacatili yn Dios ipiltzin nepapan cozcatl ma ica ya ma [o]ntlatlauhtiloya[n].
4. Çan timotimaloa in ica ya iuhquin cozcatl toyahua ya ye momactzinco moyetztica in Dios piltzintli nepapan cozcatl.

titoco toto tito cototo tiquititi titiquiti

1. Cuelcan, cuelcan, pipilté, tomachhuané, yyahue tlatoya[n] ya tihuia[n] yn ixpan Tiox Jesuchristo teocuitlaxahcalli manca tictottilizque ticchalchiuhcuentaxcozcamacazque o anqui ye [tl]auhquecholtlaztalehualtotonatoc anqui ye oncan yio aye hoaya yeha.
2. Cuicoya[n] tlapitzalcalitequ-i toncuicatinemi “Tleon?, mach y xochitl ahuiaxtimani?” a o anqui ya tlauhquecholtlaztalehualtotonatoc
3. o anqui ye huel axca tlaçocozcatl quetzalli yan tonilpililoque motlaçoconetzi çan yio mochalchiuhmaquiz mocozcatzin ni mochipa ichpochtle Santa Marian-i ylilili yahuiya toyolio aye aye ahuiya nica ana
4. yquetzalpetlatipan aya tonca ca ye mocha ilhuicacihuapilli yehua nepapan in maquizteoxiuhcalitequ-i totlatlauhtiloyan tlapalchalchiuhihhuitl moxochicuentaxtzin ticpouhtinemi a ypanypa aya timitztlatlaocoltemotinemi ya ylilili yahuiya.

toquiti toquiti tiqui tiqui tiquiti tiqui tocoto

1.  Yn nepapan tototl yn moquecholhuan Tiox tzatzihua ya nica a a[n]qui huel iuhqui tlahuizcalli patlantinemi a angeloti oncui[ca] ya “Gloria in excelsis deo”, xahuiaca[n], xompaquica[n] ane.
2. O anquin huel iquac topan temoc yn ilhuicac tlanextli ya nepapan xochitl moyahua ya oncuica ay in moquecholhuan ”Dios Gloria in excelsis”, et.
3. A yn oquica[c]que in oriente in teteuctin-i in ilhuicacpa onilhuiloque aya tlalticpac ca omonexti temaquixtiani teocuitlatl copalli ya mirra concuique ye ic onacico ya im Pelem coniximatque nelli Tiox nelli oquichtli ya
4. Yn [atto]pa ya mitziximatque Tiox on cozcateuh quetzalteuh tlamatque yn tlatoque aya contlatlauhtique aya yn ichpochtli Santa Maria a[n]qui huel yehuan conitquitaque mote[n]yo ya nelli Dios nelli oquichtli ya.
5. Yntla timochi[n] titlamahuiçocan ticcahuané onca Belem huel ixpoliuhtoc quetzalli yan cozcatl chalchiuhteuh oncan xamanque yn pipiltzitzinti [tla]papalmaquizcozcatica a motimolotiaque ylhuicatl ytec ayan tepilhua ana
6. yn choquizcuicatl momamalintoc tlayocolxochitica ay melelquiça in motlaçohuan Dios tlapapalmaquizcozcatica et.

tico toco ticoti ticotoco ticoti tiquitititi tocotiti

1. Nonohualco ye nican in tlalhuacpan-i conchalchiuhyhcuilotihui ya in nonohualcatl teuctli yn don Diego y yeonelyao Ximohuayan-i concauhtehuaco yn atl o yan tepetl-i yaho yaho yli yaho aye ma yca nichoca yio.
2.  Teocuitlacoyolihcahuaca ye nocuic huiya niqui[n]-ya-temoa yn cozcateca yn nohueyohuan-i nichalchiuhçoço ya intlatol niquimelnamiqui ye nelli yehuan o contlalitiaque yn atl o yan tepetl-i yaho yaho.
3. yio ahua yiaoo hohuaye yaho aye ye moxiuhtomolcozqui ypan nitlatlayocolcuica nicnotlamati a an catlique yn tepilhuan?, o catli yan quauhtl ocelotl? yn inca ye micuilo atl o yan tepetl o nel yaque Ximoaya.

toquiti titiquito totiquititiqui toti toti totoco totoco totocoto

1. Yancuicachalchiuhtli nocuic tlacati niquelcahua ya niCempoaltecametl a nohueyohua ololihuic acatic cenquiztoc nichuipan yc yxpan nonquiztihuetzi icel teotl o anqui ye huellaxcan tlaltech acic yehoc y Belem yiaha yaha ylilili hao ahua ye nel a ma onnetotilo nican.
2. Ontlaçotlanqui cozcapetlatipan a noco[n]yectlalia nocuic nicCempohualtecametl a nohueyohua ololihuic acatic.
3. Chalchiuhizquixochitl yn manca nontlachichina ya nitlacuilolcozcaquetzaltototl nictzinitzcanamatlapaltzetzeloa-n cuica yecahuiloyotica çan nonpahpatlantinemio o ahuayia oo ay lili yanca ya.
4. On nepapan in cozcanenelhuatica nicxeloa ye oncan noncuicapehpena ya nitlacuilolcozcaquetzaltototol nictzinitzcanamatlapaltzetzeloa cuica yehcahuiloyotica çan nonpahpatlantinemi o o ahuayia oo.

(Miguel Figueroa Saavedra)